جريدة الشاهد اليومية

الجمعة, 16 مايو 2014

المليفي والاستقالة

استغرب من أمور تحدث بالبلد ينطبق عليها المثل شر البلية ما يضحك.. فانهيار حفرة بجامعة الشدادية مثل ما قرأت بإحدى الصحف تسببت بموت عاملين مصريين ثم يقرر أو يفكر الوزير المليفي بالاستقالة، بالله أبي أسأل هل الوزير هو مهندس المشروع؟ اذا ماهو المهندس هل هو حارس للمشروع او هو اللي ركب حفارة وحفر المكان او الجماعة يبون الشارة على الوزير؟  ليش مايتحاسب العباقرة اللي مادرسوا البنيه التحتية صح اويتحاسب اللي خططوا وقرروا مكان بناء الجامعة وعرفوا هالارض خصبة وقوية ممكن نزرع فيها جامعة تنبت انشالله وتكتمل بخطة خمسية وايد ناس نقدر نتهمهم بسبب الانهيار بس الظاهر ربعنا يتبعون قصة قراقوش اللي تقول قرر أراد أن يتخلص من أبوه البخيل بأن يدفنه وهو حي فجاء إليه ومعه بعض الربع  وهو نايم وربطوه وشالوه وحطوه بتابوت وشالوا التابوت للمقبرة وهم بالطريج مر عليهم قراقوش وسمع صوت الاب بالنعش يصرخ ويطلب العدالة والرحمة ..فوقفهم قراقوش وقال لهم شالسالفة في واحد بالنعش يتكلم فانكروا ولكن الاب بالنعش قال قصته وسمعها قراقوش وهني نط الولد وقال ياسلطانا العظيم انا متاكد من موت ابوي ولكنه يحب يعذبني بموته مثل ماكان ماذيني بحياته واذ منت مصدق اسال الشهود .. وسآلهم قراقوش اللي اشهدوا ان الاب ميت « اشخانه الربع »؟

فقال لهم قراقوش اذا جذيه فالريال ميت تكفي شهادة اثنين منكم فكملوا طريجكم للمقبرة فلو كل واحد نصدق كلامه جان ماقدرنا ندفن ميت مايرضى يندفن بالمقبرة !!

آه يالقهر عندنا وايد قراقوشات للاسف  بعضهم يمثل الشعب وبعضهم مبهدل الشعب ..مايفهمون ان الوزير انسان يالله يقابل وزارته واجتماعاته وجلسات مجلس الامة  ورد على اسئلة مالها معنى .. وحضور مناسبات غير الاجتماعات الخارجية وعنده اهل يحتاجونه مثل ماعندكم اهل فلو نطبق قانون الاستقالات على الوزراء جان اول من استقال وزير الداخلية لان كل يوم يموتون او يتكسرون الناس بالشوارع او استقال وزير الاعلام لانه طبق القانون على بعض المطبوعات او خلو وزير الاشغال يشيل قشه بسبب هالمطبات ووو مانخلص المليفي وزير تربية ماهو مقاول وغلطان يقدم استقالته اذا الخبر صحيح خلو الناس تشتغل لاتصيرون مثل حريم شاي الضحى او اهل ديوانيات يحشون بالناس وبعدين يجذبون على بعض .. وتذكروا قراقوش اللي حكم على رجل وهو يمشي مر على ريال وزوجته والزوجة حامل والرجل بالغلط صدمها فسقط الجنين فاشتكى زوجها عند السلطان اللي امر ان يعطي الرجل زوجته للريال عشان يحملها له بسبع اشهر ويردها .. ليش تتبسمون  جنه الفكرة اعجبتكم هاا؟

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث