جريدة الشاهد اليومية

الأربعاء, 14 مايو 2014

آخ يا ديرة

مثقف جلس في طائرة بجانب محشش دار بينهم الحديث التالي:

المثقف: سمعت ان الرحلة تصير قصيرة لو تكلمنا مع بعض.

المحشش: صح وبأي موضوع تحب نتكلم؟

المثقف: طالما أني اختار خلنا نتكلم عن الطاقة النووية.

المحشش: الطاقة النووية إممممم.. قبل ما نتكلم ممكن أسألك سؤال؟

المثقف: تفضل.

المحشش: البقرة والحصان والعنز كلهم بياكلون نفس الأكل.. صح؟

المثقف: صح.

المحشش: ليش فضلات البقرة تنزل سايله، وفضلات الحصان سميكة، وفضلات العنز يابسة؟

المثقف: ماعرف برأيك ليش؟

المحشش: اذا حضرة جنابك ما تفهم حتى بفضلات البهايم تتفلسف بالطاقة النووية ليش؟

طبعا المثقف حط سماعته وقام يسمع اغاني بعد مالف وجهه عن صاحبنا المحشش.. بس بالذمة هالمحشش مايذكركم ببعض المسؤولين اللي مسوين نفسهم فاهمين بكل شي وللاسف يتعينون وكلاء ووكلاء مساعدين ومديرين وهم على الله وعلى السكرتارية قبل لايشكون خيط بإبره، لانهم من فوق قواطي من فوق هالله هالله ومن تحت «المخ ميح» فاضي وهالاشكال للاسف تتعين حسب اسم العائلة او مثل مايقول المثل لاحبتك عيني ماضامك الدهر وماكو بهالبلد الا هالولد مو بس هم وايدين  بالديرة مثلهم  فاهمين ويفتون بكل شي اقتصاد، رياضة،  سياسة، طب، تعليم ، وباب النجار مشلخ وللاسف بعضهم اصحاب قرار بوزاراتهم وللعلم في بالوزارات اصحاب قرار مايعرفون الكتابة املائيا وكتاباتهم يبيلها فك رموز عشان تنفهم ، فما اقول الا  الله يعين موظفي وزارتهم  حنا ايام العسكرية كانوا يختارون شخص يسمونه القدوة، يكون الشخص المثالي بالفصيل فياليت يتم اختيار هالمسؤولين حسب الثقافة والمثالية مو بس بالشهادات اللي نعرف شلون خذوها .. بس للاسف عندنا يتم الاختيار القدو بدل  القدوة. 

• • •

المسج اللي فعلا عجبني وبالضبط ينطبق علينا هو.. تدرون ليش الجراد مادخل ديرتنا  لأن بعض المسؤولين ماكلين الخضر واليابس ماخلوا لهم شي.

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث