جريدة الشاهد اليومية

الأربعاء, 16 أبريل 2014

صلحني بالخارج

أيام علاجي بهيوستن من المرض الشين الله يبعده عنكم ان فعلا في اتحاد خليجي بخصوص المرضى قبل لايصير اتحاد باي شي ثاني، خل اقول لكم اشلون كل فالله يسلمكم كل المرضى الخليجيين مايسفرونهم بره للعلاج الا اذ لهم ظهر بديرهم يمشي لهم المعاملة الكل مثل مثل واذا سافر واحد ماعنده واسطة ينذل كل شهر يهددونه يايوقفون فلوس اعاشته يا يوقفون الضمان العلاجي ويعيشونه بقلق وهم عارفين ان القلق بروحه مرض فليش دازينه يتعالج، طبعا هالشي مهو تبلي لا من خلال معايشتي للمرضى هناك اسمع السوالف واضحك لاني اشوف الفرق بالمعاملة، فكل الدول الخليجية لها لجان ودواوين ترسل للعلاج مع اختلاف بسيط بالمسمى فاللي جاي عن طريق الديوان الاميري كمثال هذا دربه خضر او الديوان الملكي او.. اما اللي جاي عن طريق لجنة صحية او عسكرية فهذا ربنا يعينه لانه يخاف يتوقف علاجه لاتفه الاسباب كمثال اذا لك عشرين يوم او شهر ماعندك موعد مراجعة ممكن يوقف علاجك على بالهم ان هالمريض هو اللي يحدد مواعيده موطبيبه المعالج والدولة الوحيدة اللي تختلف بهذا الاجراء هي قطر فاذا مريضهم بمواعيده فجة بين المواعيد يخيرون المريض اذا يبي يقعد او يرد بتذاكر هو يشتريها لديرته وقبل الموعد بايام يرد والعملية اختيارية، مع ان هالفترة اللي يتركها الطبيب المعالج وخصوصاً بعد العلاج الكيماوي هي مقصوده عشان يشوفون تجاوب المريض مع الجرعات وكيف يتقبلها الجسم واظن الاطباء باللجان يعرفون هالشي بس محترين ليش يأخذ معاش وهو مايراجع والمريض المسكين يبي يخلص بس مو بيده، ماعلينا بهيوستن الطقس خليجي بس فرق المطر بالصيف مايوقف وهالديرة ماهي سياحية منطقة بترولية تجارية وطبية فيها مصانع السيارات واغلب الوكالات ومراكز ابحاث طبية واغلب سكانها خليط من جميع الجنسيات وتشتهر بالاحجام الضخمة فعادي تشوف طيف من بعيد تحسبه سيارة فلكس وتتفاجآة بان هالفلكس من الانس مقاس 7 اكس لارج صغيرعليها، لو بقارنها مع صديق اماراتي «بومريم»  الله يذكره بالخير متين بس لويوقف يمها يصير رابح صقر، الحلو بهيوستن لان مافيها شي سياحي انك تتعرف على اخوان واصدقاء من دول الخليج البعض اعوذ بالله لو يشوف له خليجي يعفس وجهه تقول شام ريحه خايسة يامعود انا الخليجي والخليج كله طريحي وين راحت، الحكومات تبي اتحاد انت اشتبي، طبعا الاصابع ماهي سوى حتى لانظلم ادري البعض يقول اشتبي من هالمقال وهالحجي، اقول اللي بوصله للمعنيين بأمور العلاج فالمريض والمرافق ماهم مسافرين سياحة ودام انتوا ارسلتوه خلوه يخلص علاجه بالكامل بدل لايرجه بتقرير ومراجعة وخاصة لجاننا بالصحة والدفاع اغلبكم اطباء وعارفين ان العاج يكون نفسياً قبل لايكون كيماوياً فالمريض بقربه وبعيد عن الاهل ويمكن يعيش او يموت والاعمار بيد الله فلاتعيشونه بقلق كل شهر ينطر تتزكون عليه بتمديد، فانتوا عارفين مراح يقيم هو يبي رحمة الله فالرجاء نيابة عن كل المرضى الكويتيين والخليجيين اقول للمسؤولين اذا وليتم فارحموا وبس، فدعوة المظلوم مستجابة بعد اشلون بتكون دعوة مريض ومظلوم تعال فكك؟

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث