جريدة الشاهد اليومية

الجمعة, 06 سبتمبر 2013

طاح حظ تنميتنا

البحر هو الخير اللي بدأت عليه الكويت ايام الطين والفقر وقبل هالوقت من كانت القرين.
ومعلوم ان القرين هو حصن صغير يشوفونه البحارة ويستدلون فيه على الطريج وراحت التسمية، عليه بالقرين تصغيرا للقرن ونذكر ان الكويت قامت على تجارة اللؤلؤ والصيد والسفر بالبحر، وعقبها النفط والطفرة اللي صارت وبفلوس النفط سوينا احسن تنميه للبحر ويال البحر بالمشمش.
بنينا افضل المنتجعات السياحية والفنادق والمدن المائية وبنينا اطول جسر يوصلنا جزيرة فيلچة وعلى جانبي الجسر سوينا استراحات ومطاعم وجبات سريعة ونوادي بحرية للطراريد واليخوت، واستراحات للي يستخدمون الجسر وهناك بفيلچه بعد سوينا على اليال افضل الفنادق وملاعب القولف الخضراء شنبي بالقرينيه ومقام الخضر نبي نواكب حضارة الدول.. عندنا فلوس وكيفنا وماعندنا حرامية ولاسراق المال العام بس نسمع عنهم ومادفنا البحر علشان لايزعلون اهل الشاليهات بنحفر انفاق تحتهم ونسوي سكك للقطارات السريعة.
ولا يزعلون اهل الشاليهات والمبجلين الوزرا والاعضاء سووا قوانين بحرية وخلوا كل العالم يتعلم منهم سووا محميات بحرية بعرض البحر علشان الثروة السمكية للعلم المحمية البحرية تعيش على الاقل 600 سنة ولقوا حل حق مشكلة الصرف الصحي المجاري ماقامت تصب بالبحر.
سوولها محطات تكرير وخلوها تصب بالجزر عشان يخضرونها طل بعينهم للحين الريحة فايحة.
وبچذيه خلصنا من الروايح الكريهة بس باقي ريحتهم شيخلصنا منها، وتميزت عقول ربعنا الاعضاء بسن قوانين تلزم الدولة ببناء فنادق عائمة بالبحر شوف الفسق وين وصل لدرجة ان الشعب الكويتي قام يزعل اذا سقط اي عضو بالانتخابات لان كل النواب اهل شهادات.
اي طل ب طل وصل فيهم الفسق يسوون مطار مائي علشان يستوعبون السياح تنزل فيه الطيارات المائية والمطار تحت الماي قوية قوية قوية ودي اصدق چذبتي
البحر
البحر بكل دول العالم خير وسياحة
وبحر الكويت انترس دفان وطين
واعضائنا بس نجرة وهواش بالساحة
وتفكيرهم بس شلون يبوقون الملايين
وماخلصنا من فتوى كل چلب ونباحة
كل چلب ينبح بالطائفية لربعه الطائفيين
وعقب ماكان اليال للتونس وحق السباحة
صار دفان وفحم الشوي ومتروس قطين
حسافة

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث