جريدة الشاهد اليومية

الثلاثاء, 24 أغسطس 2010

وربي‮ ‬طالت الغيبة‮ .. ‬وقلبي‮ ‬ويش أسوي‮ ‬به؟

الجوهرة بنت محمد
هذا البريد محمى من المتطفلين. تحتاج إلى تشغيل الجافا سكريبت لمشاهدته.

قبل أيام سافر حشاشة جوفي‮ ‬ولدي‮ ‬بندر للعمرة عسى الله‮ ‬يحفظه‮ ‬يعقله علي‮ ‬وكل مسلم ومسلمة،‮ ‬حسيت بفراغ‮ ‬كبير كبير ما تتصورونه،‮ ‬وهذي‮ ‬اول مرة‮ ‬يسافر بروحه مع أنه كمل‮ ‬20‮ ‬سنة وطالب في‮ ‬السنة الاخيرة في‮ ‬الكلية،‮ ‬ومتزوج وأب لطفلة أموووورة وهي‮ ‬الجوهرة الصغيرة،‮ ‬ومع هذا حسيت بوحشة وأعد الليالي‮ ‬لرجعته‮ ‬،‮ ‬افتقدناه على الفطور خاصة أنه شهر فضيل وكريم،‮ ‬افتقدت ضحكته وغشمرته معنا،‮ ‬افتقدته بنته بحركاته اللي‮ ‬يدوخها فيها المسكينة،‮ ‬سبحان الله قبل أيام ترجمت بعض مشاعر وأحاسيس أم ثكلى فقدت ولدها اللي‮ ‬مرح‮ ‬يرجع لها‮ ‬،‮ ‬وأنا اليوم ماني‮ ‬صابرة على فراق بندر اللي‮ ‬بيرجع ان شاء الله بعد كم‮ ‬يوم‮!!!‬
ياكرم رب العالمين وياعظمة رحمته باهدائه قصر الحمد للي‮ ‬يصبر ويحمد على فقدان فلذة كبده،‮ ‬والله اشتقت له كثير،‮ ‬واحس‮ ‬غيبته طالت وقلبي‮ ‬عذبني‮ ‬بغيبته‮.‬
بندر الله‮ ‬يحفظه ويستر عليه وعلى كل مسلم ومسلمة من صار عمره‮ ‬16‮ ‬سنة وهو‮ ‬يبي‮ ‬يسافر مع ربعه،‮ ‬وكان رد والده الله‮ ‬يخليه لنا الرفض دائما،‮ ‬ما سمح له بالسفر ابدا مع شباب كان ومازال‮ ‬يسافر معنا ثم مع زوجته،‮ ‬كان‮ ‬يزعل ويتضايق رغم اننا نشرح له برحابة صدر الاسباب اللي‮ ‬تمنع أي‮ ‬أب‮ ‬يخاف على ولده ويبي‮ ‬يحفظه من الخراب والدمار والمشاكل والامراض وغيرها وكان ومازال الابن البار المطيع‮ .‬
انا أدري‮ ‬ان كل شاب‮ ‬يحب الاستقلالية وانه صار كبيراً‮ ‬ويتحمل المسؤولية ويبي‮ ‬سفرات وطلعات مع الربع ويعايرون اللي‮ ‬مايسافر معهم ويذبحونه بالتعليقات القاتلة في‮ ‬بعض الاحيان لكن اذا بغينا نحكم عقولنا كآباء وأمهات مسؤولين مسؤولية كاملة امام الله عز وجل في‮ ‬أبنائنا فيفترض اننا نقف وقفة جادة في‮ ‬هذا الموضوع‮. ‬
كم من الشباب تعود على السفر مع الشلة وفي‮ ‬هذا السن الصغيرة واصبح عادة سيئة‮ ‬يمارس فيها كل انواع الرذيلة والاستهتار الاخلاقي؟ كم من الشباب‮ ‬يرتكبون حماقات ويسجنون في‮ ‬هذه الدول وتعالي‮ ‬ياعوايلهم‮  ‬طلعيهم من السجن وادفعي‮ ‬رشاوى بالهبل عشان‮ ‬يطلعون براءة واذا كان حظهم زين كانت السفارة الكويتية متعاونة اذا ماكانوا عمك أصمخ؟ كم من الشباب‮ ‬ينقلون الامراض الخبيثة والعياذ بالله لأقرب الناس لهم وتنتهي‮ ‬حياتهم في‮ ‬مستشفى الامراض السارية أو‮ ‬يصابون بأمراض تمنعهم من الانجاب طول عمرهم؟ كم من الشباب‮ ‬يقتلون ويذهب دمهم هباء منثورا بسبب هوشة على فتيات‮ ‬يارب لطفك هل هذي‮ ‬حسن الخاتمة اللي‮ ‬يتمنونها؟‮  ‬وكم منهم من‮ ‬يدمن على الشرب أو المخدرات وتضيع أجمل سنوات عمره وعمر من حولهم؟ كم من الشباب‮ ‬يرفضون الزواج لأنه في‮ ‬نظرهم سجن ويمنعهم من حريتهم فيظلون في‮ ‬دوامة اللذة والمتعة حتى‮ ‬يصحون في‮ ‬يوم من الايام لا ونيس ولا حبيب ولا ولد‮ ‬يشدون الظهر فيه؟ كم من الشباب‮ ‬يتزوجون بنات الحلال اللي‮ ‬يعذبونها معهم سواء بإهمالهم أو بممارساتهم الشاذة اللي‮ ‬تعودوا عليها مع بنات الرذيلة فما‮ ‬يقدرون‮ ‬يستمرون في‮ ‬زواج صحيح وسليم؟
من هو المسؤول؟ انا متأكدة أن معظمنا ان لم‮ ‬يكن كلنا على‮ ‬يقين بدور الآباء الرئيسي‮ ‬في‮ ‬التربية والتي‮ ‬أصبح‮ ‬ينافسهم فيها الكثير من المسؤولين المدمرين من انترنت شاذ وقنوات مثيرةواصحاب سوء وغيرهم‮.‬
لحل هذه المشكلة انا اتمنى‮:‬
‮{ ‬توعية الآباء بخطورة هذه السفرات‮ ‬غير الآمنة وعدم الرضوخ للابناء في‮ ‬هذه السن‮.‬
‮{ ‬تعزيز الوازع الديني‮ ‬لدى الابناء والآباء،‮ ‬يا كثر فلوس الامانة العامة للاوقاف ماشاء الله رايحة على المسابقات والحملات والادارات الجديدة المستحدثة كل شوي،‮ ‬لو تنظم امانتنا الحبيبة رحلات شبابية لبلاد اسلامية بأسعار رمزية‮ ‬يعلمونهم فيها السلوكيات الطيبة ويعززون عباداتهم ويقربونهم لله ويساعدون فيها المسلمين في‮ ‬هذي‮ ‬الدول،‮ ‬وممكن‮ ‬يتعاونون مع اللجان الخيرية ويتابعون تبرعات المحسنين مثلا‮ . ‬
بأن‮ ‬يكون هناك قرار جريء بعدم السماح للشباب بالسفر دون سن الـ21‮  ‬الا بإذن والده كما هو معمول به بالمملكة العربية السعودية‮ .‬
‮{ ‬توعية الابناء في‮ ‬المرحلة الثانوية بفوائد السفر وخطورة التهور والاستهتار من الناحية الدينية و الصحية والامنية والاسرية وغيرها وعرض القصص الحقيقية بدون اسماء لتكون عبرة وعظة‮. ‬
تحميل ولي‮ ‬الامر كل المسؤولية في‮ ‬سفر هؤلاء الشباب والمراهقين وسحب جوازات سفرهم لمدة سنة مثلا في‮ ‬حال ارتكابهم لحماقات تسيء لبلدنا الحبيب الكويت قبل أن تسيء لهم‮.‬

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث