جريدة الشاهد اليومية

الثلاثاء, 28 أغسطس 2018

طرارة .. آخر تحديث

تقعد ساعات جدام التلفون وياخذ وقتك بالكامل مابين وسائل تواصل ويوتيوب ومواضيع كلن حسب مايهمه وساعات تستهويك متابعة تعليقات الآخرين لمعرفة كيف تفكر العقول تجاه موضوع مطروح وماهي ردود الافعال وفجأة ومن بين التعليقات اللي تقراها كم من السخافة، خاصة بالانستغرام اللي قاموا يسمونه مال اليهالو ..هل تريد القضاء على كرشك ؟؟ لدينا الحل !! والا الثانية كاتبة خلطات ام عبدالله للشعر عجيبة وام عبدالله ما عندها شغل مطلعة كل الخضرة الذبلانة من الثلاجة ودقتهم بالخلاط وبتبيعهم عالناس بدال ما تقطهم !وشعرها اصلا منتف وحايشها ثعلبة !والثانية اللي تبي تزيد متابعينها ببلاش بدال ما تدفع 60 د.ك مادري شكثر وتشتريهم يامال الفقر ضيفوني حالفة اصير 35 كيلو ! وهي لامحتوى ولا عمات عين  انزين انتي تحلفين احنا شكو ..صومي !وواحدة تبي تنتحر طبها مرض وبتنكد على خلق الله وبتلفت الانتباه! وعبي وبهارات وقحافي وكل شي ..!كل هالتعليقات عادة تلقونها تحت فيديو منزله راعي الحساب المقرود اللي ابتلش وفتح اكاونته للعامة لزيادة متابعينه وماله علاقة كلش مول بلي ينكتب تحته، المشكلة مو هني عالكلام اللي ما ينقال ،صج يخرعون واعيالنا في منهم مراهقين ويشوفون هالامور !واذا ييت تعلق على احد المواضيع بجدية ويكون الموضوع شادك تضيع بين خلطة ام عبدالله وام عباية وام كرش !ويدخل عقبها عالخاص لازم طرار او طرارة وواحد بيتعرف ! اي ليش عاد ! الطرار يقول ساعديني انا من فئة الب.....عيب شوهتوا صورتهم ! اعرف ناس اغنى من الكويتيين نفسهم ومحترمين وعزيزين نفس ! لا والا الطرارة اللي تبي هدومي واكسسواراتي .موجودة محادثاتهم ما جذبت ولما تدخل على حسابها تشوفها عندها مشروع صغير وتبيع ما دري شنو بسكوت بهردة  مادري مارشملو شكله استغفر الله جنه جفل خروف مقطع عوي والحساب كله ماركات وتبي هدومي واغراضي بعد! لكن نقول الحمدلله لما نقارن بالسابق ونلاحظ ان تمت السيطرة على 70٪مما كان يحدث من فوضى وعشوائية بفضل هالقوانين الرادعة للجهلة وأصحاب النفوس الضعيفة لكن ايضا العملية تحتاج لرقيب ليس فقط على محتوى الفيديوات ومايضعه البلوقر او الاكاونتات ولا فقط للسب والشتيمة بل للتعليقات ذات المضمون السيئ ودعوات التحريض على الفسق لأبنائنا واغوائهم وايضا هالسلع والغش وابعاد هالأطفال والمراهقين من استخدام هالمواقع للتعليق ،وادارة الانستغرام، اعتقد في صدد إلغاء كل الحسابات للأعمار اقل من 13 سنة وهذا شي جيد ولحد يقول الاهل والاهل ترا ما قمنا نلحق على عصر التكنولوجيا والتقنية وسرعتها وصاروا اعيالنا يعلموننا عالتلفون اليديد لاشريناه والخطر اصبح داخل بيوتنا في مخاطبة عقولنا وافكارنا كبار وصغار ولو كل صاحب حساب يدير حسابه مضبوط ويتحمل مسؤولية متابعينه نفس ادمن قبل ايام الماسنجر جان محد غلط ..وي صج عتيجه بس ترا خوش فكرة. 

آخر تحديث ..
غير كويتي يعرض تقرير له يبي يسوي طفل انابيب وبمستشفى خاص خمس نجوم وحاط لنا السعر ويالله ابي ياهل تعالوا دفعولي ...باجر ابي حق مدرسته ومتاخر اقساطه وتكفون عطوني حالة انسانية !وجامعه مهدد بوقف قيد !وتاليتها انتوا تقررون وتبدون حياتكم دون تخطيط وتخلفون دون تفكير والعالم تشيل همكم خوووش طرارة كلشي بلاش وين عزة النفس عيل والتخطيط للمستقبل والا بس الياهل ايي ورزقته وياه .. الداد لهالياهل اللي بتكونون انتوا اهله.

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث