جريدة الشاهد اليومية

السبت, 21 يوليو 2018

كيكي وكسر قواعد المرور!

كل مايحدث في أقصى الأرض يصل بسرعه البرق الى أدناها بفعل السوشيال ميديا، وحتى الموضه التي كانت تاخذ وقتاً طويلاً للتماشي معاها سابقا ومسألة نقلها للشرق الاوسط يحتاج وقتاً بل وسنوات، اصبحت الان على تزامن وقتي معها لحظه بلحظه من خلال متابعة المشاهير واخبار العالم.. وكثيرة هي التحديات حتى من قبل ظهور الانترنت كتحديات الاكل.. وأطول..وأكبر..وأصغر ..الخ وبمشاركات جماعية والتي دخلت بعضها موسوعة غينيس لكن حامض على بوزهم البعض وما زالت تلك التقليعات الى الآن ولكنها اصبحت تحديات فردية عالأغلب والتي تحدث ضجة دايما في عقول الشباب وكان اخرها من مدة تحدي الثلج «آيس بوكت جالنج» واللي اترست حزتها طوارئ المستشفيات من المرضى المستبردين اللي مو قد الحركة..ومن اللي خلصوا ثلج الجمعيات عالفاضي وزعلوا الي عايشين عالثلج !لكن هالتحدي في الاصل كان له هدف عند الغرب إما أنه يقبل هالتحدي او يتبرع بقيمة 100 دولار لصالح حمله لنشر الوعي لمرض التصلب العضلي والأهم جمع التبرعات لمكافحته لكن ربعنا مايدرون وين الله قاطهم وياحبهم للتقليد راعين هبات وبعضهم للحين مايدري ليش انحذف بالثلج على راسه وعباله دقه !
يينا الحين حق تحدي من نوع اخر ماله اي هدف بالحياة سوى هز ياوز وهي اغنية «ان ماي فيلنج جالنج» من اعماق مشاعري وهي ترجمة لاغنيه مطرب الراب الكندي الأصل «دريك drake» يايبتها لكم طازه  لانها مولعة الدنيا برة بس للحين مانتقلت العدوى لربعنا بشكل مباشر والله يستر منها ومن الحوادث اللي بتصير من وراها،التحدي عبارة عن رقصة يقوم فيها السائق للسيارة او من يكون بجانبه وهي تمشي ويفتح الباب وينزل يرقص على انغام كيكي ملعونه الوالدين !عاد اهو وحظه يا كيكي تقفل الباب عليه وتدش سيارته بشبه! أو حظه يطلع موشي ويخلص شحن اللي قاعد يصوره وتفشل المحاولة ويقوله عيدها ويتناجرون او يتطاققون وماتسوى عليه لواهيب الحر و القار بالشارع والحصم اللي بيطير على صماخه  لما يزعل رفيجه ويهده وخل تفيده كيكي وقتها .المهم ماعلينا انا حبيت احذركم من هالكيكي خطر على سلامتكم وسلامة اللي حولكم وهمتكم يالداخليه للسيطرة قريبا على وضعية كيكي وربعها.

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث