جريدة الشاهد اليومية

الأربعاء, 21 سبتمبر 2016

العلم نور

هذا فيديو شفته وعجبني كلام راعيه فقلت تقرونه.
الشخص اللي يملك العلم له مكانة في المجالس وله مكانة في المجتمع ويوصل اعلى المناصب بسهولة بعكس الشخص اللي ما عنده علم تلقى ماله قيمة، الوظيفة اليوم يحصل عليها اللي يملك اكثر شهادات اللي يملك اكثر علم ياخذ اكثر راتب ياخذ منصب أقوى كله بسبب العلم.
خلونا نشوف الجانب الثاني الناس اللي ما تعلموا كيف هي حياتهم ما ودنا نقول الكل لكن الأغلب انتشروا ما بين مخدرات وبين ضياع ما بين سجون لأن العلم يغذي عقل الإنسان ويخليه يدرك تماما ويفرق ما بين الخطأ وبين الصواب ليش حسستوني ان بداية الدراسة هي اكبر هم عندنا واكبر مشكلة وقاعدين نرعب فيها أطفالنا ونخوفهم بينما سوريا قاعدين يدفنون أطفالهم بسبب الحرب وافريقيا قاعدين يدفنون أطفالهم بسبب الجوع هذي هي الهموم هذه هي المشاكل وحنا قاعدين نطنز مساكين يوم الاحد دراسه.
اليوم اكثر الدول في العالم ازدهرت لأن فيها تعليم قوي وفي دول كثيرة سقطت لأن مافيها تعليم هل نسمي هذا الشي فسق في النعمة لأن التعليم عندنا مجاني من أولى ابتدائي الى الانتهاء من الدراسات العليا بالمقابل لو تقيس هذا الشي وتسوي مقارنة بالدول الثانية راح تجد انك قاعد تدفع عشرات الآلاف بمقابل انك تعلم ولدك.
احنا الجامعة تدخلها يعطونك مكافأة بينما في أميركا الطالب يدخل الجامعة ومبلغ الجامعة يبقى دين عليه اذا تخرج وتوظف يسدده ويقعد اكثر من 10 سنين وهو يسدد مبلغ دراسته في الجامعة لذلك احيانا كثير من الأميركان يحرمون نفسهم من السيارات ومن الوناسة لانه قاعد يدفع قسط عالي جدا لدراسته في الجامعة.
انت دخلت مجانا وتعلمت مجانا لا وتاخذ مكافأة شهرية عليها ومع ذلك قاعد تتطنز، في المملكة الدراسة عندنا ودول الخليج الحمد لله تعتبر من الدول القوية في التعليم وتعتبر ايضا من الدول اللي تدعم ابنائها وشعبها بالتعليم صحيح ان في دول قد تكون أقوى منا تعليم ولكن تاخذ من المواطن مبلغ اكبر وقيمة اعلى لذلك هذول الشعوب جعلوا للتعليم اهمية وحنا استهانوا بها وقاموا يطقطقوا عليها، زين يا اخي المفروض تكون محضر خير وترسل الرسايل الايجابية رسايل تدعم الناس تحفز الناس لا توصل رسالة ان الشخص اللي ما يدرس هو الشخص المستانس لا يا حبيبي روح شوف الناس اللي ما معاها شهادات روح شوف كيف حالهم روح شوفهم في وظايف بسيطة متواضعة هذيل الناس اللي ما درسوا وبالمقابل روح شوف الناس اللي درسوا وتعلموا روح شوف وين وصلوا، الامام الشافعي يقول من لم يذق مر التعلم ساعة تجرع ذل الجهل طول حياته، صحيح الدراسة فيها تعب لكنها فترة بسيطة وتعدي اتعب هالفترة وراح تعيش في نعيم طول حياتك.
في عبارة في احدى الجامعات ألم الدراسة لحظة وينتهي ولكن اهمالها ألم يستمر طول الحياة.
اتمنى انك تفتح اليوتيوب وتفرج كيف الدول الثانية أو الفقيرة قاعدة تعلم ابنائها بينما حنا ابنائنا يدرسون في افخم المدارس وافخم الجامعات وأقوى البنايات وبرفاهية ونعيم مقارنة بدول قاعدين يتعلمون على لوح خشب قاعدين يتعلمون في البر.
احد المقاطع شفتها لمدرسة بالهند هذه المدرسة مالها أسوار لانه تحت جسر يتعلمون تحت جسر ويجون الطلاب بشكل يومي عشان يتعلمون تعليم جدا بدائي وفي اكثر من دولة في شرق آسيا أطفالهم يروحون للمدارس على رجولهم ولكن في الطريق يواجهون أقوى واصعب المصاعب يقطعون طرق جدا وعرة عشان يروحون لمدارسهم ويتعلمون.
آخر شي بقوله لكم اتمنى ان التعليم عندنا ما يكون هو محض للسخرية والضحك والتنكيت المفروض التعليم عندنا يكون سلاح نستقوي فيه يكون هو الوسيلة اللي حنا نطور فيها بلدنا ونطور فيها انفسنا اتمنى ان التعليم يكون من أهم الأشياء الأساسية في حياتنا اللي يكون فيها اول أهدافنا اللي نسعى لها لأن هو اللي يرفعنا وهو اللي يعزنا ويعلي شانا وشان بلدنا وترى في أشياء كثيرة ثانية تقدر تضحك فيها غير التعليم.


 

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث