جريدة الشاهد اليومية

الأحد, 28 ديسمبر 2014

راحت سنة

الله اشكثر السنين اللي بفضل الله عدتنا لتحتل بدلها سنين جديدة وتصبح القديمة ذكرى مؤلمة او سعيدة لانها تسحب اعزاء معاها كانوا بيناتنا واختفوا منهم اباء اخوان امهات اصدقاء يا يتمون يحتفلون معانا بنهاية السنة يا ينتهون قبل نهايتها، فيا جماعة كم سنة احتفلتم برحيلها وشلون كانت معاكم، خلونا نرجع بالذكريات نبدأ من رياض الاطفال اللي كانوا على ايامنا ينومونا ومانرد لبيوتنا الا العصاري نوم اجباري بالروضة وبعدها ندخل المرحلة الابتدائية يسلمونا ملابس ودفاتر ويعطونا اكل ويدرسونا صح، المدارس قبل احسن من اليوم رغم التكنولوجيا اللي ردتنا قرى باسم العلم فكان الناظر ايامنا يجحش الطلبة الهاربين والكسالى والمشاغبين بالطابور والاباء يفرحون لان الوزارة اسمها التربية والتعليم، بس يوم صارت بس تعليم خربت، المعلم اللي كاد ان يكون رسولا اليوم اللي بأمه خير يعاقب طالب لان البعض يظنون ان اولادهم ملائكة ممنوع الاقتراب والتصوير منطقة محظورة، عادي لان هالاباء يطبقون المثل الشاذي بعين امه غزال،  ما علينا نرد للسنة اللي بقى لها جم يوم وتودعنا شللي صار واستوى فيها بهالديرة، خطة التنمية اشصار عليها بعد هبوط اسعار النفط والحمد لله شالوا قرار زيادة اسعار البنزين وانشالله ما يشيلون بدل الغلاء مثل ما سمعنا انهم بيخفضون رواتب العاملين بالنفط  وبيسوون وبيسوون وكل اللي بيسوونه فيه ظلم لمحددوي الدخل، وحسب ما وصل لنا على لسان احد الشيوخ ان معاش الوزير ما يزيد على 2500 شهريا وهو وزير وندري ان الخبر لك عليه بس لو نفرض انه صح وخريج الثانوية العامة بالنفط ياخذ 3000 او اكثر جذيه ظلمنا الوزير اللي يداوم صبح وعصر وو وما ياخذ بدلات اذا الوزير ما ياخذ من ياخذ؟ امي؟  الله يحفظها. في امور كثيرة يا أهل الحل والربط ممكن توفرون منها بيزات وتعوضون شوي من خسائر بيع النفط هذا اذا فيه خسائر بالاصل فاسعار النفط بيد الاوبك والاوابك ترفعه وتنزله بوقف الانتاج والابتعاد عن السوق السودا والمقايضات، ومثل ما نسمع عندنا غاز يحترق وتفكرون تبيعونه، لا تفكرون، بيعوا عشان لا تسدون الخسائر من ظهور  المتقاعدين والمواطنين الكحيانين لا تناشبونهم على علاوات ومكافآت وبدلات بفرض ضرايب، والله الكويتي ما يستاهل حنا ما نتابع شيصير بالدول اللي حوالينا لان حنا بديرتنا افضل منهم  بامور كثيرة والناس حاسدينا حتى على مجلسنا اللي موعاجبنا لان الديمقراطية وحرية الصحافة والنقد البناء بديرتنا موجودة بس عند بعض الدول من الكبائر، ممنوع، وهذه بروحها نعمة عندنا ولكن الاصابع ما هي سوا عند بعض الناس للاسف  اللي اقدر اشبهه بالدياي لان المثل ينطبق عليهم الدياية تموت وعينها بالسبوت فهالناس ما تشبع مثل هالدياي مع انها بخير ونعمة وعندها فلوس لو تنوكل بثلاث وجبات ما تخلص بس شنقول غير ان هالفئة دائماً تقول هل من مزيد، تجمع للورثة ناسية ان رسم ابتسامة على وجه محتاج تسوى الدنيا وما فيها، فقبل لا تروح السنة  فكروا اشسويتوا فيها غير الاحتفالات بقدومها وذهابها اشسويتوا للديرة اللي عطت وعطت وفكروا باللي اخذتوه اظن يكفي خلو شي للاجيال القادمة، فيا أهل الحل والربط فكروا بسلبيات السنة اللي بتنتهي وسووها ايجابيات بالسنة الجديدة. الناس العالة على البلد اللي ماخذين وظائف اهل البلد مشوها، عينوا كويتيين بالمكاتب الخارجية والسفارات والمكاتب الصحية بدل لا تنفعون الا جانب، عدلوا مخرجات التعليم من احتياجات لا تكدسون موظفين بدون فايدة وعايدة، طبقوا العقاب على المقصرين وكافئوا المنتجين  بالسنة الجديدة، ندري ما تقدرون تشيلون الواسطة ولكن على الاقل خلوها للي يستاهل، للمحتاج بدل الاقربون حتى لو كانوا هالاقربون ميح قواطي فوق فلا تعطونهم اماكن اللي تعبوا ودرسوا ويبون يخدمون البلد بس مو معطينهم فرصة، ما يكفي ان الوزراء محسوبين على بعض العوائل والدواوين فديرتنا كلنا نعرف ان ولد الطبيب يصير طبيب والضابط ضابط والممثل ممثل وو.. غيروا بالسنة الجديدة هالاسلوب وحطوا الرجل المناسب بالمكان المناسب.المهم قبل لا تنتهي السنة حبيت اقول لكم اتمنى السنة الجديدة تكون سنة  خير على أمة الاسلام اولا، وعلى ديرتنا وشيوخنا وشعبنا ثانيا، سنة تكون فعلا سنة انتاج وتخطيط وقوانين صح تصب بصالح الديرة والمواطنين وتكافح الجريمة وآفة المخدرات، سنة تكون مرسومة صح بالتنمية ما تخلي مشروع بو سنتين ينمط وما يخلص  بعشر سنين وفيه مليون عيب، وخلوا التربية قبل التعليم والتجنيد الالزامي ابعدوه عن الواسطة وخلوه للكل مو ناس وناس، حتى البنات علموهم الاسعافات الاولية  والاتكال على النفس وبسكم من العمالة اللي خلتكم اتكاليين وربادية. الشاب هالايام لو تبنشر سيارته يقف له وانيت او تاكسي يسوي البنشر بفلوس عشان لاتحترق اصابيعه او تتسود، ماقول الا مالت على البامية ام... وكل عام جديد وانتو بخير عساها سنة خير احسن من اللي ولت وربي يحفظ الكويت بشيوخنا.. قولوا آمين؟

إضافة تعليق

إن التعليقات المنشورة لا تعبر بأي شكل من الأشكال عن رأي الموقع و الموقع لا يتحمل أي مسؤولية قانونية أو أي أعباء ماديه أو معنويه من جراء التعليق المنشور وبالتالي صاحب التعليق وحدة هو من يتحمل المسؤولية الكاملة.

مود الحماية
تحديث